Tere Galay Mein Jo Baahon Ko Daal Rakhte Hein

تیرے گلے میں جو بانہوں کو ڈال رکھتے ہیں

تجھے منانے کا کیسا کمال رکھتے ہیں

تجھے خبر ہے تجھے سوچنے کی خاطر ہم

بہت سے کام مقدر پہ ٹال رکھتے ہیں

کوئی بھی فیصلہ ہم سوچ کر نہیں کرتے

تمہارے نام کا سکہ اچھال رکھتے ہیں

تمھارے بعد یہ عادت سی ہو گئی اپنی

بکھرے سوکھے پتے سنبھال رکھتے ہیں

خوشی سی ملتی ہے خود کو اذیتیں دےکر

سو جان بوجھ کردل کو نڈھال رکھتے ہیں

کبھی کبھی وہ مجھے ہنس کہ دیکھ لیتے ہیں

کبھی کبھی میرا بے حد خیال رکھتے ہیں

تمہارے ہجر میں یہ حال ہو گیا اپنا

کسی کا خط ہو اسے بھی سنبھال رکھتے ہیں

خوشی ملے تو تیرے بعد خوش نہیں ہوتے

ہم اپنی آنکھ میں ہر دم ملال رکھتے ہیں

زمانے بھر سے چھپا کر وہ اپنے آنچل میں

میرے وجود کے ٹکڑے سنبھال رکھتے ہیں

کچھ اس لئے بھی تو بے حال ہو گئے ہم لوگ

تمہاری یاد کا بے حد خیال رکھتے ہیں